АШУҮИС
Докторын дараах сургалт
Эрдмийн зөвлөлийн шийдвэрээр сонгогдсон дотоод, гадаадын судлаачдыг тэнхим, лаборатори, эрдэм шинжилгээний хүрээлэн, их сургуулийн эмнэлэгт хамтарч судалгааны ажил гүйцэтгэх боломжоор хангадаг хөтөлбөр.
Тухай
АШУҮИС-ийн докторын дараах сургалтад хамрагдах судлаачийг их сургуулийн Эрдмийн зөвлөлийн шийдвэрээр сонгон шалгаруулдаг. Хамтын ажиллагааны гэрээтэй гадаадын болон дотоодын байгууллагын судлаачид хамрагдах эрхтэй бөгөөд судалгааны ажлаа их сургуулийн бодит тэнхим, лаборатори, эрдэм шинжилгээний хүрээлэн, эсхүл их сургуулийн эмнэлгийн аль нэгэнд байрлан гүйцэтгэдэг.
Хөтөлбөрийн үргэлжлэх хугацаа 1-2 жил бөгөөд судалгааны үр дүнгээс шалтгаалан 3 жил хүртэл сунгах боломжтой. Судлаач элсэхдээ их сургуулийн Тэргүүлэх судалгаа, боловсролын захиргаа (ТСБЗГ)-тай гурван талт гэрээ байгуулдаг бөгөөд хагас жил тутам ТСБЗГ-т, судалгааны ажлаа дуусахад Эрдмийн зөвлөлд эцсийн тайлангаа тус тус тайлагнадаг.
Судлаач судалгааны үр дүнгээ Web of Science, Scopus, эсхүл PubMed эрдэм шинжилгээний сэтгүүлд ганц буюу харилцах зохиогчоор хэвлүүлэх шаардлагатай. Судлаач хамтарч ажиллаж буй хугацаандаа их сургуулийн багшийн цалингийн түвшинд цалин хөлс авах бөгөөд гэрээний хугацаанд өөр байгууллагад давхар ажиллахыг хориглодог; гэрээ зөрчсөн тохиолдолд эд хөрөнгийн хариуцлага хүлээлгэх нөхцөл гэрээнд заагддаг.
Удирдагчаар их сургуулийн дэд профессор, түүнээс дээш цол зэрэгтэй, санхүүжилттэй судалгааны төсөл удирдаж буй багш ажиллана. Судлаач нэр дэвшихдээ төрийн албан хаагчийн 1-р маягт, сүүлийн 5 жилийн дотор хамгаалсан докторын зэргийн гэрчилгээ, тухайн сургууль/хүрээлэнгийн Эрдмийн зөвлөлийн нарийн бичгийн даргаар баталгаажуулсан эрдэм шинжилгээний бүтээлийн жагсаалт, мөн тухайн сургууль/хүрээлэнгийн Эрдмийн зөвлөлийн дэмжсэн тогтоолыг бүрдүүлдэг.